តើម៉ាកគឺជាអ្វី?

 តើម៉ាកគឺជាអ្វី?

ម៉ាកគឺជាសញ្ញាដែលមើលឃើញ ហើយអាចសំគាល់លក្ខណៈខុសគ្នានៃទំនិញ ឬសេវាកម្មនៃសហគ្រាសនីមួយៗ ។ ម៉ាកដែលប្រើប្រាស់សម្រាប់ទំនិញហៅថា ម៉ាកពាណិជ្ជសញ្ញា ហើយម៉ាកសម្រាប់សេវាកម្មហៅថា សេវាបញ្ញា។

ម៉ាកមានច្រើនប្រភេទដូចជា៖

• ម៉ាកជាពាក្យ
• ម៉ាកជារូបសញ្ញា
• ម៉ាកជាអក្សរ
• ម៉ាកជានិមិត្តសញ្ញា
• ម៉ាកជាលេខ
• ម៉ាកជាស្លាកសញ្ញា
• ម៉ាកជាការរួមគ្នានៃពាក្យនិងលេខ
• ម៉ាកជាការរួមគ្នានៃអក្សរនិងរូបសញ្ញា
• ម៉ាកជាពណ៍
• ម៉ាកអាចជាពណ៍ច្រើនចម្រុះរួមគ្នា
• ម៉ាកជាឈ្មោះ
• ម៉ាកជាសញ្ញាដែលមើលឆ្លុះ៣ជ្រុង
• ម៉ាកជាហត្ថលេខា

ម៉ាកអាចមានលក្ខណៈជា ពាក្យ អក្សរ រូបភាព រូបសញ្ញា (ឡូហ្គោ) និមិត្តសញ្ញា ពណ៍ បង្គុំនៃពណ៍ឬបង្គុំនៃសញ្ញា។ មិនម៉េនគ្រប់ម៉ាកទាំងអស់ សុទ្ធតែអាចចុះបញ្ជីដើម្បីទទួលបានការការពារនោះទេ។

តាមមាត្រា៤នៃច្បាប់ស្តីពីម៉ាក ពាណិជ្ជកម្មនាម និងអំពើនៃ ការប្រកួតប្រជែងមិនស្មោះត្រង់កំណត់ពីម៉ាកមួយចំនួនដែលមិនអាចចុះបញ្ជីបានដូចខាងក្រោម៖ 

ក. ម៉ាកដែលមិនអាចសម្គាល់លក្ខណៈខុសគ្នានៃទំនិញឬសេវា របស់សហគ្រាសមួយទៅសហគ្រាសមួយផ្សេងទៀត

ខ. ម៉ាកដែលបណ្តាលឲ្យប៉ះពាល់ដល់សណ្តាប់ធ្នាប់សារធារណៈ សីលធម៍ ឬប្រពៃណីល្អរបស់ជាតិ។

គ.  ម៉ាកដែលនាំឲ្យសាធារណៈជន ឬមជ្ឈដ្ឋានពាណិជ្ជកម្មភាន់ច្រលំទៅនិងប្រភពភូមិសាស្ត្រទំនិញឬសេវាពាក់ពន្ធ័ ឬធាតុដើមឬលក្ខណៈខាងក្រៅរបស់ទំនិញឬសេវានោះ។

ឃ. ម៉ាកដែលដូចគ្នានឹងឬធ្វើត្រាប់តាម ឬមានចំនុចណាមួយដូច សញ្ញាជាតិ ទង់ជាតិ និងនិមិត្តរូបផ្សេងៗ ឈ្មោះឬឈ្មោះសង្ខេប ឬអក្សរកាត់ឬសញ្ញាឬត្រាជាផ្លូវការ ដែលអនុម័តដោយរដ្ឋណាមួយ អង្ការ អន្តរជាតិរដ្ឋាភិបាល ឬអង្ការដែលបង្កើតដោយអនុសញ្ញាអន្តរជាតិមួយ លើកលែងតែមានការអនុញ្ញាត្តពីអជ្ញាធរមានសមត្ថកិច្ចនៃរដ្ឋនោះឬអង្ការនោះ។

ង. ម៉ាកដែលដូចគ្នាឬប្រហាក់ប្រហែលគ្នា ដែលនាំឲ្យច្រលំនឹងម៉ាកឬពាណិជ្ជកម្មនាមមួយដែលល្បីក្នុងព្រះរាជាណាចក្រកម្ពុជា ឬបង្កើតពីការបកប្រែនៃម៉ាកឬពាណិជ្ជកម្មនាមដែលល្បីនោះ សម្រាប់ទំនិញឬសេវាដូចគ្នាឬប្រហាក់ប្រហែលគ្នានៃសហគ្រាសមួយទៀត។

ច. ម៉ាកដែលដូចគ្នាឬប្រហាក់ប្រហែលគ្នាដែលនាំឲ្យភាន់ច្រលំនិងម៉ាកពាណិជ្ជនាមមួយដែលល្បី ឬបង្កើតពីការបកប្រែនៃម៉ាកឬពាណិជ្ជនាមដែលល្បីនោះ ហើយដែលបានចុះបញ្ជីក្នុងព្រះរាជាណាចក្រកម្ពុជា សម្រាប់ទំនិញ ឬសេវាកម្មដែលមិនដូចគ្នា ឬមិនប្រហាក់ប្រហែលគ្នា ដោយការប្រើប្រាស់ម៉ាកនោះធ្វើឲ្យខូចប្រយោជន៍ដល់ម្ចាស់ម៉ាកដែលល្បីនោះ។
ឆ. ម៉ាកដែលដូច ឬស្ទើតែដូចគ្នាទាំងស្រុងទៅនឹងម៉ាកដែលជាកម្មសិទ្ធិរបស់ម្ចាស់ផ្សេង ដែលបានចុះបញ្ជីរួចហើយ ឬបានដាក់ពាក្យស្នើរសុំចុះបញ្ជីមុន ឬទទួលបានអាទិភាពចុះបញ្ជីមុន នៅឯបរទេស ចំពោះទំនិញឬសេវាកម្មដូចគ្នាឬទំនិញនិងសេវាកម្មដែលពាក់ពន្ធ័គ្នាយ៉ាងជិតស្និទ្ធិ។

សិទ្ធិដែលទទួលបានតាមរយៈការចុះបញ្ជីម៉ាកដូចខាងក្រោម៖ 

ក. ចំពោះម៉ាកដែលទាក់ទងនិងទំនិញឬសេវា ដែលបានចុះបញ្ជីរួចហើយ ការប្រើប្រាស់ម៉ាក់នោះ ដោយជនមួយក្រៅពីម្ចាស់ដើម ត្រូវមានការយល់ព្រមពីម្ចាស់ដើមជាមុនសិន។ 

ខ. ម្ចាស់ដើមនៃម៉ាកមានសិទ្ធិប្តឹងទៅតុលាការប្រឆាំងនិងជនណាម្នាក់ដែលប្រើប្រាស់ដោយរំលោភទៅនិងម៉ាករបស់ខ្លួនដោយគ្មានការយល់ព្រមពីម្ចាស់ដើម។ ម្ចាស់ដើមក៏មានសិទ្ធិប្តឹង ផងដែរចំពោះការប្រើប្រាស់នូវសញ្ញាដែលប្រហាក់ប្រហែលនឹងម៉ាកដែលខ្លួនបានចុះបញ្ជីរួចហើយ និងការប្រើប្រាស់ម៉ាកដែលទាក់ទិនទៅនិងទំនិញ និងសេវាកម្មនៃម៉ាកដែលបានចុះបញ្ជីរួចហើយដែលបណ្តាលឲ្យមានការភាន់ច្រលំជាសារធារណៈ។

គ. សិទ្ធិដែលទទួលបានតាមរយៈការចុះបញ្ជី ម៉ាកនិងមិនរាប់បញ្ចូលនូវការដាក់លក់ទំនិញនៅលើទីផ្សារក្នុងព្រះរាជាណាចក្រកម្ពុជា ដោយម្ចាស់ដែលបានចុះបញ្ជីឬដោយមានការយល់ព្រមពីម្ចាស់ម៉ាកនោះ។

រយៈពេលការពារនៃម៉ាក

ម៉ាកដែលបានចុះបញ្ជីហើយមានសុពលភាព១០ឆ្នាំចាប់ពីកាលបរិច្ឆេទនៃការទទួលពាក្យចុះបញ្ជី។

តាមការស្នើសុំ ការចុះបញ្ជីម៉ាកមួយ អាចធ្វើសារជាថ្មីសម្រាប់រយៈពេល១០ឆ្នាំម្តង ជាបន្តបន្ទាប់ ក្នុងលក្ខខណ្ឌដែលម្ចាស់ដើមបង់អាករចុះបញ្ជីជាថ្មី។